Хүүхдэд зонхилон тохиолдох мэс заслын эмгэгийн оношилгоо, эмчилгээний зарчим сургалт зохион байгуулагдлаа
- 21 September 2016
- Published on Лхагва, 21 September 2016 10:05
Хүүхдийн төрөлжсөн мэс заслын тусламж үүсч хөгжсөн 60 жилийн ойн арга хэмжээний хүрээнд “Хүүхдэд зонхилон тохиолдох мэс заслын эмгэгийн оношилгоо, эмчилгээний зарчим” сургалт 2016 оны 9 дүгээр сарын 8-ны өдөр ЭХЭМҮТ-д зохион байгуулагдлаа.
Осакагийн их сургуулийн профессор Masayuki Endo зочноор уригдан “Ургийн мэс засал”, “Үүдэл эс” сэдвээр лекц уншсан нь хүүхэд, эх барих эмэгтэйчүүдийн эмч нарын сонирхолд нийцлээ.
ЭХЭМҮТ-ийн Ерөнхий мэс заслын тасгийн эмч, АУ-ы магистр, клиникийн профессор, тэргүүлэх зэрэгтэй эмч А.Цэнджав, Чих хамар хоолойн мэс заслын тасгийн эмч, АУ-ы магистр, тэргүүлэх зэрэгтэй эмч Г.Үржинханд, Нүдний мэс заслын тасгийн эрхлэгч, АУ-ы магистр, тэргүүлэх зэрэгтэй эмч Ч.Цэнгэлмаа, Бөөрний мэс заслын тасгийн эмч, АУ-ы магистр Ө.Оюунбилэг, Эрүү нүүрний мэс заслын тасгийн эрхлэгч, АУ-ы доктор, зөвлөх эмч Г.Аянга, Мэс заслын эрчимт эмчилгээний тасгийн эрхлэгч, АУ-ы магистр, ахлах зэрэгтэй эмч Ч.Дуламрагчаа, Ерөнхий мэс заслын тасгийн эмч, АУ-ы магистр, клиникийн профессор, Тэргүүлэх зэрэгтэй эмч С.Туяа, Мэдээгүйжүүлэг, хагалгааны нэгдсэн тасгийн эрхлэгч, АУ-ы магистр, тэргүүлэх зэрэгтэй М.Ариунтунгалаг нар хүүхдэд зонхилон тохиолдох хэвлийн цочмог эмгэгийн оношилгоо, ясны идээт үрэвслийн оношилгоо, эмчилгээ, чих хамар хоолойн эмгэгийн яаралтай тусламж, дутуу нярайн ретинопати, өсвөр үеийн эрэгтэй хүүхдэд үзлэг хийх аргачлал, уруул тагнайн төрөлхийн сэтэрхий эмгэгийн эмгэг жам, мэс заслын дараах эрчимт эмчилгээний онцлог, хагалгааны өмнөх бэлтгэл лекц уншиж сонирхсон асуултад хариулт өглөө.
Багануур, Булган, Говь-Алтай, Дархан, Дорноговь, Орхон, Сүхбаатар, Хөвсгөл, Хэнтий аймаг, Баянгол, Баянзүрх, Сүхбаатар, Сонгинохайрхан, Хан-Уул, Чингэлтэй дүүргийн 150 эмч, холбогдох мэргэжилтэн оролцож багц цаг бүхий сургалтын гэрчилгээ олгов.
Хүүхдэд үзүүлэх мэс заслын тусламж үйлчилгээг сайжруулахын тулд сургалтанд оролцож амжаагүй хот, хөдөөгийн эмч мэргэжилтнүүд хичээлийг www.ehemut.mn сайтаас авч ажилдаа хэрэгжүүлэхийг хүсч байна.
Хүүхдийн эмнэлгийн мэс заслын тасгийн хамт олонд ажлын амжилт хүсье.
Сургалт, сурталчилгааны алба